溫度日記
Hearty Journal

2023年4月29日的日記
今日好曬好熱 對眼好怕光 成日都睜唔大咁,唔知係咪咁,慢慢行下坐下車,點解我會去咗你樓下?飲住檸檬茶,坐咗係公園,慢慢好多回憶擁晒出嚟,有開心有傷心有痛心,仲記得我哋以前好似夜鬼咁,11,12點我就會出現係你屋企,成日想為咗你做到幾多就幾多,換床單抹塵,安裝床,一齊整張書枱出嚟,好似一齊整個家出嚟咁,諗返既時候,對眼含住眼淚傻笑。仲記得你成日坐喺呢個位食煙,一支接一支,你為咗我介煙,我真係好感動。唔知而家無咗我,你會唔會又食返?食還食,唔好食咁多,始終傷身家,傻佬。 坐咗大約半個鐘,我都怕會見到你或者uncle auntie, 慢慢又行行行,不知不覺間,我去咗將軍澳海傍,坐返係石邊,好記得真係好記得呢一晚,唔知你仲記唔記得?呢一晚我好醉,不停喊捱住你,我們差唔多坐到天光,就係呢一晚,你應承我無論發生咩事,你都唔會掉低我,諗到呢度,我又忍唔住眼淚鼻水全部擁哂出嚟。你做得好好,你履行承諾,因為而係。。我掉低左你。。對唔住,我真係好想同你一直行落去,但我無辦法要你照顧一個病人,我更怕既係,如果我突然之間走咗,咁你點?我唔想你傷心,唔想你揹住我一世,你要努力搵你嘅幸福,知道嘛?

溫度日記 Hearty Journal