喺台灣, 曾經有個唔知算八字定姓名學定睇相... 嘅人, 話我係外柔內剛的人。 堅強嘅人, 特別係女人, 係咪都愛恨分明的呢? 女人堅強, 係咪就代表咩都可以扛上身, 唔駛人鍚, 愛護, 體貼... 凡事都變得理所當然? 可是, 每個人, 都會有累的時候。特別是女人, 累了, 以為還有個依靠, 可以放下任何事, 依偎著另1半, 放聲痛哭, 然後又做回個女漢子。 每1日, 最安落最舒服最無憂, 就係搭巴士返工嗰1個小時嘅旅途中, 真真正正可以瞓個好覺, 唔駛擔心BB喊, 擔心BB踢被... 無需心掛掛。其次, 就係沖涼嗰1刻, 開住花灑, 熱水打在痕癢嘅身體, 可以暫時上痕, 仲好舒服, 暫時可以RELAX... 日日如是。 咁辛苦為乜? 我諗所有媽媽都會覺得好辛苦, 但係值得的。我地為BB, 放棄好多好多嘢, 會唔開心嗎? 總會有少少, 我地都有感覺架嘛... 但值唔值得? 值得。身心疲累, 還換來1雙媽媽手, 但係就算幾痛, 見到佢喊得咁可憐, 都仍然唔捨得唔抱, 再同自己講, 你抱得幾多年? 2年? 3年? 5年? 以後, 可能想抱, 佢都唔俾你抱, 更甚者, 嫌你煩啊... 我唔係咩虎媽, 我俾到你嘅, 我會盡量俾, 希望你做個開心, 健康, 善良嘅人, 呢3樣嘢, 好難得架...