我鼓起好大勇氣，先決定到寫呢一大段野比你，我既心情就好似今日天氣咁，好大雨好黑，但我都希望你會慢慢睇。 話你知，呢個星期我諗起好多事，諗到自己又開始頭痛翻發，包括咁耐以黎你講過既說話，我偷睇到既野，我八卦返黎既事，自己都重新整理一下，當中有D其實令我覺得好難受，好唔開心，個心好痛，好攰。不過唔緊要啦，唔想講細節，唔想令你有機會因為呢樣唔開心。所以呢幾日有時會好似冇咩心機同你講野，不過你好似冇乜所謂，連我以為你擔心我果一兩句，都只係你多口八卦問下，或者得我自己在意呢樣野，是旦啦！ 其實我同你同小多，就好似三塊磁鐵咁，你同小多而家就係痴埋左既兩塊磁石，而你就一直用同我同一個極向對住我，無論我點樣向你靠近，都唔會收窄到我地之間既距離，正如我無論做咩你都冇感覺一樣，套用你既說法，感覺冇左就冇左。或者只有等你將自己正負極反轉既一日，我地先再有可能行近一步，但果一日已經唔知會唔會來臨。 其實我真係好無聊，無聊到間中會上RO偷望你，會上IG同FB睇你有冇更新，明明佢會跳通知出黎，又會間中上FB睇你最後上線係幾時。但每一次望，尤其係入RO，都係會帶住唔開心既心情熄Game，我都開始唔明白自己係抱住咩心情去八卦，睇住你叫人地老公，睇到你寫情歌歌詞，望住你同其他人表示對方令你心動，再見到有人肆無忌憚咁叫你老婆講愛你而你唔反感仲欣然接受，我唔明點解仲要入Game去折磨自己？ 直到當日發現你一聲不響Del左我IG好友，我感覺有少少覺悟，呢排同你講野，或者你真係生日好忙，有好多事要做，忙到5-10秒回一個msg都冇，尤其係深夜，我呢D閒人既msg可能完全係浪費緊你手機data咁。當有好多好多事比我重要時，我就知道我既消失可能對你已經無所謂，多謝你用行動話比我知，我有幾咁唔重要。 我知你認真同小多拍拖，知你已經打算過有機會去台灣同佢一齊生活，知佢唔開心會去了解同氹佢，亦都知你會同佢傾住電話訓，又或者叫佢起身打電話比你之類，種種事都證明佢喺你心中好好好重要。咁耐以來要你應付我，驚我難受而一直忍住自己感受，辛苦你了。 你未搬時有好幾次你因為同佢傾電話而叫我細聲，尤其係有一次我在廚房想攬住你時，你知我有幾心痛嗎？不過都過去了，是吧。如果你決定真係想我簽紙，你簽好再比我啦，唔駛擔心，我會喺上面加簽。 我真係心累了，希望你諒解。我諗我心意你知，我唔係唔再愛你，亦都唔係唔想等你，而係佢先係你最中意最在乎既人，呢一刻會想同佢過一世既人，你可能唔覺又或者唔認，好早之前佢已經重要到你會不時望電話望手錶，會盡量秒讀秒回信息，你亦都已經將老公既位置比左佢，咁試問我仲憑咩等你呢？我唔想令你有顧慮之餘，好衰咁講，或者可以比返少少尊嚴我，我覺得做備胎，比人拎來攝時間，正如前排有一日你突然同我撒嬌，話執屋想食雞煲，我無意見到你相簿，原來果日你心情唔好而小多冇理你。或者係我諗多左啦，但我發現原來等你地關係差先有我存在既空間，呢種感覺真係十分唔好受。 睇完，或者你會真係好嬲，當然你亦都可以反駁話我諗太多，亦都可以話我誤會你再同我澄清，我當然歡迎，如果你諗完會咁做，我開心添。不過隨緣吧，有幾在乎同心中有幾愛，其實行動好難呃到人。我只係想正式同你講聲，我唔想粒聲唔出咁對你冷淡，已經成年人，同你一齊左咁耐，知你有D說話唔識亦可能唔想講出口，就正如當日你直接除低戒指咁，用行動話比我知你既想法，但我覺得我要對你有交代。未來唔知，但我唔想再將自己放喺呢段冇空間容納我既三角關係入面了，好攰好攰。 當日我應承你分居，你可以食得返野，希望今日我同你講唔再糾纏，你可以再搵返失去左好多年既笑容吧。再見。