恩： 我地今晚返黎啦！你自己生活左兩個幾星期，面對我地回歸，面對聽日又要照顧兩個小朋友，你心情如何？會覺得有壓力，唔想我地咁快返嗎？ 老實話你知，我而家心情好忐忑，一方面覺得終於可以返屯門，喺你面前比你睇到我呢兩星期既努力，可以再貼心咁照顧你，小朋友都可以再同媽咪生活。但另一方面，我唔知要點樣面對你，我仲好在意你既生活，我好怕，好怕當我見到你唔再需要我，唔想再理我，唔在乎我時，我會好傷心好痛苦，我真係好怕好怕好怕... 我發現我唔係介意你同小多或者之前同田田玩得埋，我係好介意你已經唔將我放喺一個重要既位置，你會寧願同佢地分享喜怒哀樂，你都唔願意同我講一句閒偈，是嗎？正如我離開屋企果日，我其實原來唔係嬲你就咁丟低海蕎喺地台食奶，我唔係嬲你攰去訓覺，我係唔明點解你連簡單同我講一句，叫我起身或者快D返，叫我幫手睇住仔女你都唔願意。我唔知點解你會除左必要事之外，完全唔想同我講野。 你真係咁決絕，淨係想要分開嗎？我而家連一絲希望都見唔到，你知道嗎？你之前講過，當你回頭想一齊時，我會唔會仲等緊你。不如我問返你，你呢一刻仲希望我等你嗎？ 我唔知我可以點，我究竟要點做先岩？好似你咁講，我好似點做都係錯？ 試過而家咁平靜地將心意諗法講你知，你會無動於衷唔回覆我。 試過之前情緒化地想同你講清楚關係，你會以為我想搵你嘈交。 又試過我乜野都唔做從你生活中消失，你就不斷喺我腦中出現。 最後我同你講唔再打擾去說服我自己，你話我知分開你唔好過。 放手咁痛，分開你唔好過，點解仲要咁做，真係唔可以再好好咁一齊生活嗎？ 我只係好想好好愛你，好想好好咁喺你身邊陪你，好想你批准我陪住你渡過每一日。我今朝起身就諗，既然你既未來冇我，冇我的話你亦都開心自在好多，不如就咁算啦...但係我好唔想分開，唔想放手，我唔捨得。12年黎既相處，你既所有野喺我眼中都變成優點了。不過，我仲有其他選擇嗎？我感覺我做再多，我都冇可能令你返轉頭。係咁樣嗎？ 呢三個月仲會一齊生活，我究竟要點做你先會回心轉意？有冇野係我可以做到？ 我唔想比我父母，我既朋友同小朋友知我最深處有幾唔開心，有幾深愛你，我只想同你分享。你呢，又係點既心情？我有權知道嗎？ 健