2022-06-02 星期四 1917hr 24歲，當上公務員，月入已經超過2萬5，投入服務唔夠一年，人工已經接近3萬，頂薪更可以接近4萬5 但我決定離開? 距離自己還是警察呢個身份得返唔夠2個禮拜了，我真係唔知自己呢一個決定岩唔岩，對好多人黎講，警察呢一份工，係公務員，亦都係紀律部隊，長遠唔怕冇工作亦唔怕俾人解雇，唔少人對我要離開都感到好驚訝，只係落左地半年左右，當中就已經有2次提出辭職，離職之係搵唔搵得返呢份人工，又係一個未知之數，工作量，壓力又會唔會俾警察更高，都冇人知。 第一次辭職 當時係夜更，因為唔適應輪SHIFT， 而且每一日都唔知自己做緊乜野，人生既意義都冇埋，每一日就係返工，睡覺，食飯再返工，果陣時自己不斷問自己，其實自己實際做緊乜野，為左追數去告D無關痛癢人食煙，罰$5,000。 為追數，求求奇奇搵ID就算，做CASE亦求求奇奇，唔去調查太多，本來自己想成為一個警察，係因為自己想幫人，但原來警察呢份工實際幫人既意義根本就唔大，而且仲不斷做好多警察唔應該做既事，當時自己壓力大到連睡覺都睡唔到，精神壓力極大，大到自己要去睇心理醫生。 向上級交出我的辭職信，但當時被上級拒絕，更被建議先去看看心理醫生，再決定....... 心理醫生 當時候，真係頂唔順，落地大約已經2個月，每一晚都瞓唔到教，而且情緒化得好利害，每日都極度負面，情緒負面到係自己24歲仔以來，從來都未試過，果段日子幾乎每一日都會諗負面野以及向女朋友發放負能量，中醫調理、安眠藥、音樂等等全都試過，但無放。最終約見心醫生，見完發覺完全冇用，只係單純你講出你所想既事，但完全幫助唔到你解決問題，你都會負面都會瞓唔到，見完醫生呢一步俾同事知道，令到自己壓大更大。 我，甘心嗎? 之後既時間入面，我冇再去睇過心理醫生，當中亦包括疫情問題，總之推得就推，因為我覺得去簡直浪費時間，期後果段時候我都不斷過住相同的日子，但睡眠質數相對地都慢慢有好轉，但每次轉更，都會瞓唔到，一直循環，追數、輪更、做阿四....... 走位? 同隊更有唔少年資比我高，亦都過住同我一樣既生活，輪都未輪得到我，我問自己幾條問題: *會唔會做呢份工做一世? 我好肯定答自己 答 : 唔會 * 自己打算做到幾時先走? 答 : 三年試用期後? 十年? 唔知 *假設三年後走，你出返去你可以做d乜? 你學到d乜? 答 : 原來自己答唔出呢條問題，警察呢段時候，我到底學到d乜野技能? 系統? 執法? 槍? 但原來自己警察入面所做既事，出返私人公司，冇認受性，自己亦都學唔到d乜野特別技能可言。簡單來講，出返去會無價值 / 無可能搵得返呢個人工。 所以其實點都要走，真係不如早d走，起碼自己趁人工仲未去到好高，趁自己仲後生學識更加多技能，増值自己，等自己有價值去搵錢，而唔係靠體力，靠聽命令、靠出賣健康去賺錢。但話雖如此，3萬蚊的確好吃香，我最為擔心既係，我辭職之後搵唔返類等既人工，如果搵得返，根本無野要擔心。