終於即將滿月了！ 以前見到啲人生小朋友係家常便飯咁 就覺得生並唔係咁難，又覺得生左bb就會順利長大⋯ 但原來到真係生發時⋯先知道每步驚心！ （而點解我會有「輕鬆」既誤解，我相信係每個父母因為「愛」而非常用心解難，先令到再難既事都比人睇落好順手好易做到咁！） 掃風問題事件簿： 初生既逸朗有一次食奶拍風，唔知係唔係我太唔溫柔，拍痛佢，佢整左個醜樣表情比我，鬥雞眼，嘟嘴反脷，全身撐直，仲要hold機hold左10-20秒，嚇到我以為佢要出大事，我嚇到喊左出黎，驚慌地不斷問「做咩咁既樣既！做咩咁既樣既！」好彩嫲嫲係到，佢拎走左逸朗安撫佢，係身上拍兩拍就變返正常⋯嚇到我完左件事，驚魂未定再喊左半個鐘有多⋯ 睡眠問題事件簿： 前三個星期因為不同既事佢食奶都食得好差，之前啲生死問題就唔再講了，就講因為新手爸媽既節奏/喂奶量問題，引致佢成日都訓唔到、訓唔夠，引發既問題係攰到無力食奶⋯食得少自然好快餓，令佢好快醒又訓得少⋯訓得少又繼續無力食奶，無限loop！真係慘到⋯ 後黎係不斷向身邊媽媽求救方法，終於知道「食、玩、訓」三步曲，仲要1-1.5小時內完成⋯（知道左bb越耐未訓就會越訓唔到，進入抗奮狀態），雖然三步曲到而加都未做得好，但都改善左換片，喂奶，掃風個節奏(可能做熟左啲）⋯叫做終於訓返多啲好啲啦⋯ 喂奶問題事件簿： 改善左訓教，心諗今次無死啦，佢可以安心食多啲野，訓多啲教啦！點知又一個新課題⋯呢個新人類有左力飲奶，有力到變左「狼太郎」⋯好狼死咁食奶⋯食太快太急，係咁「肯親」、又嘔左幾次奶⋯搞到要狂掃風（每次停左食奶都要重新掃風，要掃到佢gu返啲空氣出黎），係咁掃走哂啲時間，又開始拖慢哂啲節奏⋯啊！媽呀！好驚又返返去個loop到！ 諗過不如早啲喂食，等佢無咁肚餓咁食，埋唔哂變「狼太郎」，但叫唔醒佢⋯佢總係係最餓果時⋯先醒！ 又諗過不如盡力質佢食多啲，等佢成日都飽，當然考慮到佢成日「肯親」⋯呢個方法都係算吧啦！ 最終係不斷試不斷失敗之下，佢第三個星期自己突然食得好左⋯唉！媽媽表示⋯心很累⋯ 滿月之後既挑戰又係啲咩呢⋯ 唔想期待⋯只想平平安安等佢長大⋯ 但我知唔會如我所願⋯ 呢隻育成遊戲真人版，果然難⋯ 希望18年後可以安心爆機⋯ 待續⋯