溫度日記
Hearty Journal

3月 28日的日記
其實今日條腰有點痛,不過無講俾佢知。我唔想成日小小事都煩住佢咁,因為我唔想再次見到果位嫌棄我覺得我好煩嘅黃生。到底要點樣先會消除呢D顧慮,而且仲覺得有種好重嘅無形壓力令我就算再深愛都唔敢放膽咁投入去愛佢。 今晚同佢傾左一陣電話,雖然係好短好短嘅幾分鐘但對於我黎講呢幾分鐘已經好珍貴。突然間諗起之前樹熊車住我見我個樣成日都好似悶悶不樂咁,之後果晚佢帶左我去食熊貓飯。其實呢間嘢之前係我一直都好想黃生會帶我去嘅地方,但無諗到最後係同其他異性朋友去食。 食完佢問我有無地方想去,我答無我都唔識路都唔知有咩地方好去。最後我地係港島區到周圍遊,之後去汀九橋…黃金海岸…再歸家!係歸家嘅時候我講左句多謝你今晚陪左咁耐好耐都無試過有個人咁樣陪我傾計。之後樹熊答返我,下……好簡單嘅事黎你咁已經覺得足夠啦!咁樣睇你之前果個真係完全唔理你架wo… 我望住車窗外面其實係好想喊,我只係講佢忙多嘢做姐! 我好清楚自己到底想要嘅係D咩,但我明白好多嘢唔係我想就會得到。我無可能去強迫任何人去滿足自己嘅需求,如果有機會得到就要學懂珍惜。或者依家同佢咁樣保持個關係反而係最好嘅方式,後備始終係後備…永遠唔會見光嘅一日,一見光呢段關係就到完結嘅一日。鬼叫自己愛上個係有家室嘅男人,遊戲一開始個規則就已經係咁只能責怪自己竟過份投入。依家我只希望同佢開心一日得一日,有D事得過且過未算囉!因為遊戲總會有完結嘅一日,而輸家由一開始就注定係後備果位!預期帶住傷痛咁走倒不如珍惜依家嘅一切記起開心回憶!

溫度日記 Hearty Journal