今日部電話變返之前咁平靜，而我都變返之前咁無再無時無刻留守電話汁邊等一個人嘅信息，無再成日望住個whatsapp睇變左兩個藍剔未，無再因為已讀不回而感到失落。 由佢搵返我之後，無錯…本來開始放低緊嘅感覺係呢段時間係返左黎，我都有想再俾多次機會大家嘅感覺。 但到最後竟然發現到對方嘅新戀情… 作為第三者，或者呢D就係報應！當初我插入佢地嘅婚姻到今日就到他人插入我地嘅戀情。我無得怨任何人，只係怪自己當初無帶眼識人…以為自己遇到世上最好嘅男人。 男人ma,有邊個唔鐘意新鮮感。只可以講我討唔到佢歡心留唔住佢個人同佢個心…或者果個女仔真係比我更適合佢。我唔係唔想挽回佢而係如果佢真係愛我又點會係我有左嘅呢段期間同第二個開始，經過琴晚之後…我更加體會到一個人傷心可以去到幾傷幾痛，果種痛係令我想喊但已經再喊唔出，而且有D嘢根本就唔可以強求。今日突然好想睇多次《春嬌與志明》其實呢套戲近呢幾個月我成日都會開出黎睇，因為真係太似我同佢。 而且春嬌有好多嘅對白都係我好想同佢講嘅說話… 最記得2017年1月2號果晚電線正係做緊呢套戲，一路睇就一路喊… 當時我嘅身邊係出現左位好似牙sam呢個角色嘅男生，同佢之間會有點曖昧嘅感覺… 呢個男生每次嘅出現都會好似套戲咁係我同佢嗌完交又或佢每次都令我感到失望嘅一刻。佢38歲而佢就28歲…起初我遇上佢嘅時候，佢就好似做左我嘅臨時避風塘。佢同芒果係兩種唔同嘅人，我同芒果一齊成日都會好嘈好似兩個大唔透嘅細路咁，佢會同我白痴會同我影好多相。 但同牙國反而就好靜成日都唔多講嘢，係我身邊望住我做自己嘢篤電話咁就過左一日。雖然佢係悶但佢好多時都會睇得出我係明知自己已經撐唔住但都要死撐到底。偶然我都會被佢一兩句嘅說話感動到… 但個心其實係好渴望感動我嘅人係芒果。有好多嘅事過去芒果會去為我做，但唔知幾時開始已經再無為見到我笑容而做任何事。慢慢對佢嘅愛就越變越卑微… 平日已變得冷冷淡淡嘅佢偶然突然會有一兩日比平時理會多左我些小！起初我都會以為佢終於記起我想起我對佢嘅愛，但慢慢就好似惡性循環咁重複。 其實芒果有無計過我地到底有幾耐無見同時又冷落左我幾多個月？有某D嘢我都唔想再講，因為講完佢都係無重視過…咁仲提黎做咩呢？但到後尾先知先發現嘅真相係我呢生呢世最唔能夠原諒到佢嘅事， 點解要係呢個時候出現第4者？ 同時又要想同重新開始？ 我唔識再去相信呢個人係真心愛我，所有回憶都係假所有你不離我不棄都係假所有所有都係假。 經過今次我真係澈底咁失去愛人嘅勇氣，因為我唔敢再去相信愛情。芒果你講過係我過去嘅日子受得太多苦，日後你要我每日都過住幸福日子。但我想話俾你知過去嘅日子未算苦，最苦嘅日子係由你選擇狠心去傷害我嘅一日果日開始…而你留俾我嘅傷痕永遠都無辦法磨滅