本來以為終於可以鬆一口氣，但竟然係相反。越去忘記越會想起… 今晚真係好希望可以醉一次，好想可以停止一下諗起同佢嘅回憶。點解放低一個人係咁困難，好多人都問我佢有咩咁值得我去記掛佢…佢對你好咩？佢為你付出過咩？我諗左好耐我自己都答唔出答案，曾經佢真係對我好好但只係曾經…已經係好耐之前嘅事。我都唔知點解同佢會變成如今關係，當我以為得到被愛但原來一切都係童話式嘅謊言。由佢話老婆發現開始有好多嘢我根本就知道佢一直講緊大話，就算我唔覺但旁人都會覺得佢所講所做嘅都係編排緊離開我嘅把戲。呢幾個月入面經歷過太多事，自己面對太多問題…而我真係覺得好攰，我都係人都會想係自己需要佢嘅時候…呢個人會出現，就算唔能夠出現但只少都會關心我。 或者我地真係有緣但無份，我係好愛佢愛到連自己嘅尊嚴都放低…愛到明知係會令自己受傷都要愛！雖然係好愛但當佢一次一次莫視我嘅感受時，我就會一次一次咁失望。或者佢已經忘記我曾經講過女人嘅絕望係由男人俾佢嘅一次又一次嘅失望而煉成，而當我選擇轉身走之前我已經俾過好多機會對方。 唔知點解我會咁蠢仲會相信男人嘅甜言蜜語，我竟然會相信佢講嘅你不離我不棄。當朋友叫我唔好再諗啦，佢根本唔會再睇關於我嘅嘢。點解佢可以咁殘忍，點解要咁對一個愛佢嘅女人？