溫度日記
Hearty Journal

1月 14日的日記
2016年7月21日係我地相遇嘅第一日同時都係我地嘅故事開始嘅第一日,第一日認識第一句說話唔知點解你有種好親切好熟識嘅感覺俾我… 同你傾計我會覺得好輕鬆自在。第一眼見到你,你係我感情挫敗後遇見嘅人之中令我再次有返心跳嘅人…簡單D講一見鐘情,第一眼我見到你覺得你好高樣子斯文同我心目中鐘意嘅類型吻合。當我唔識點樣爬上你架車時,你扶我上車果刻我竟然有人生第一次嘅觸電感覺。就係果下我就知自己鐘意左你而你就係我一直想搵嘅人,當你同我開車去m記嘅時候我偷望過你揸車嘅樣係好專心…當你停低嘅時候我就回避你眼神。或者我怕羞吧…仲記唔記得你落車幫我去買m記果刻我地嘅對望嗎?我真係好掛住你當初呢個表情因為你呢個表情同呢個眼神係最溫柔嘅時候。之後我地去左順豐圍附近傾陣計而我地不知不覺間越坐越埋咁就一齊左… 。《不許你注定一人》係你第一首送俾我嘅歌,而你同時講知道我以前過嘅日子係好苦所以你唔想我日後都仲過住苦嘅日子你要成為我嘅脫苦海。呢刻我真係好感動,因為我終於遇見一個疼愛我嘅男人。 你係我遇見嘅男人中唯一一個會俾陌生人羨慕嘅男朋友,無可否認你係一D小事中係睇得出你有用心去做。就係咁你用16日嘅時間令我忘記上一段感情帶俾我嘅傷痛同上一段感情放唔低嘅事,直到知道你有老婆嘅時候…我有諗過到底放手定繼續,但我已經被愛沖昏頭腦完全無去顧慮太多選擇繼續錯落去…如果當日我選擇放棄或者反而係對大家最好嘅選擇。起初我地日見夜見總係覺得24小時唔夠,好想對方永遠係自己嘅身邊。甜蜜嘅日子我差唔多每日都跟住你開工,雖然只係停留係車廂中但只要身邊有你我已經覺得好開心好足夠。望到你好努力咁工作,雖然你為嘅係屬於你同佢嘅家而努力。但唔知點解我竟然會感動同時心痛,會唔捨得見住你好攰好辛苦都撐住完成自己嘅工作。我當時真係好羨慕你老婆擁有一個咁好嘅老公,不過你對我都好好,好到我會用100分男友黎向朋友形容你。呢段日子我真係覺得係我人生中最開心最幸福嘅時光,係你身上我得到重視,得到存在感…感覺到何謂被愛。 熱戀期過後,你開始慢慢對我疏遠開始慢慢覺得我痴身。之後就一連串嘅籍口…總係避開唔見我,直到我發現有左同時巧合地你話你老婆發現我地呢段情之後。我眼見住你對我慢慢咁變,變得越黎越陌生。以前你會好在意我嘅大小事,之後我嘅大小事你已經無心裝載。其實一直以黎我係好在意你對我地嘅bb呢件事竟然愛理不理,我會覺得點解你咁唔公平。雖然我係第三者但我肚中嘅都係你親生小朋友,點解你連關心佢半句都無。我唔係想威脅你離婚同時都唔係想要錢,我只係想要你關心下我同肚中bb嘅事。直到唔要嘅一刻係好無助嘅心情,點解係我最需要你嘅時候你永遠都唔會出現我身邊。呢條路撐得幾辛苦你知道嗎?直到我情緒開始有問題出現後,你係好左幾日但好快你又係打返原形對我莫不關心愛理不理。到底我做錯左D咩而令到你咁對我?我知我脾氣差,我知我成日鐘意激下你。但我從來都無做過一件對唔住你嘅事,同你一齊咁耐你有無一次係試過同我好好咁慶祝紀念日?對於你黎講或者從來都無重視過,但對於我黎講我係好重視關於同你嘅一點一滴。我可以為左哄你開心走去紋一個代表你嘅紋身,你要記住紋身係一世係刻骨銘心嘅諾印。而我都唔會隨便就紋代表對方嘅紋身係自己個身,除非對方係我心目中有一個特定嘅位置先會令我咁做。我唔係要你為左我而去付出D咩為左我做D咩,我只係想你可以同我好好慶祝一次紀念日咁大把但你從來都無去做到。提前或後補都未曾試過…你成日都係得個講字去哄我開心,9號你話多嘢做見唔到我一陣之後你話12號有時間見下我。其實我預左唔會有咁嘅可能發生,但到12號你照舊好似無左件事唔提唔講。其實你簡單一句今日都係未見得住有幾難?我失望嘅唔係見你唔到,我一早都預左係見唔到。但我失望嘅係你竟然好似忘記左件事咁。一路以黎我唔提唔講直到依家先講唔係我無嘢講搵嘢黎講,而係之前我仲覺得大家仲有機會返轉頭所以唔會講得太多我嘅真正感受。但今次唔同因為今次我真係發覺大家根本再無可能落去,一路而黎有好多嘢我都隻眼開隻眼閉。一路你以為呃到我其實我一路都知你講緊大話,就好似屯門公路呢次咁…明明係你架車但你會堅持唔係。除非真係巧合地咁相似,如果唔係我眼前出現嘅又係D咩?以前我一定會尋根究底,但到今時今日我已經再無呢個力氣咁做。因為我明白到一個人要扮訓任你點叫佢起身佢係要唔起身就係唔起身,而一段感情淡左就係淡左對方變左就係變左,就算我再付出幾多再花幾多時間去等待都好返唔到轉頭就係返唔到轉頭。其實你口中所講嘅老婆到底係唔係屋企果位對於我黎講已經唔再重要,因為我知道自己係你心目中早已消失。可能你怕做衰人所以由得我去麻目咁等麻目地愛直到我攰啦就會自動消失。 呢刻真係到啦,我真係覺得好攰覺得自己麻目夠。當我將我地合照放係我自己嘅朋友圈時,你第一反應係緊張咁叫我del左佢。但當中我留言內容並不是一d甜蜜字句,我留嘅係一段歌詞 《痛醒》 《沉默算吧 別再管你和誰遊戲  誰想跟蹤你一世紀 天早變亮 卻未見歸期 明白了吧 其實早已被你嫌棄 仍在每晚黑 望來望去 望床上那空氣  你快樂完便過來纏我  相信我可 快樂像最初  當初或者我亦試過相信  卻慢慢傳來痛楚  藥力漸過先知道 我每日捱一刀  凌遲或者施暴 不比愛情恐怖  無幸福草地 得一片焦土  是你燒光所有美好  現在我先知道 你愛睡人家的被鋪  骯髒了的身體怎樣抱  沒法再相信愛 也好 》 由你叫我Del嘅一刻開始,我知你根本無去顧及我感受。我永遠只係你眼中嘅玩伴,開心時會撩下我唔開心時掟埋一二角嘅角色。多謝你俾左我轉身走嘅動力,我對你最後嘅愛就係放手唔再打擾你…送最後一首歌俾你《最後一次 DEAR JANE 》你由DearJane做我地嘅開始,同樣由DearJane作為我地終結。呢首歌係想話俾你知,曾經有個人只要你需要到佢佢就隨時出現係你身邊,會對你全心全意會關心你一切做你聆聽者,會有個人每日期待可以見你一面。你曾經係某個人最重要嘅人,曾經會有個人漫無目的咁去等待過你但可惜你無珍惜過無重視過呢個默默承受所有痛苦,默默為你付出嘅人。而呢個人終於明白到你同佢呢段感情已經變成一場獨腳戲。如果你有掛住呢個人有想見到呢個人嘅時候,唔通真係難到連抽5分鐘時間都咁困難嗎?有心做我同你都好相信會做得到,無心做就根本點做都做唔到。或者有日你會突然諗起有一個人曾經咁傻咁蠢,但呢個人真係攰真係無力真係失去果份勇氣再愛落去。而屬於我同你嘅日記直到呢日正式完結 《愛越多越難過 愛後極痛都需攀過愛自己別忘記 記住無淚地去說聲最後一次 想念著你最後一次  再度記起只准今晚再度為你痛悲 在凌晨要淡忘這段憶記  刀般鋒利寄望痛傷有個限期 儘管想到有人為你蓋被抓緊放手的 勇氣愛過 痛過 也要再企起  別為愛倒地懂得鬆手也許已勝利  不至會死說過以後忘記你  明天都不再想起》最後一次。

溫度日記 Hearty Journal