結果都係一整晚失眠到天光，到底我仲能夠支撐到幾時？ 其實我真係好想可以好好咁訓一個教，但每當一合埋眼唔知點解就會係腦海中出現佢嘅影子。依家一到夜晚我都會習慣左一邊聽歌一邊睇返以前同佢嘅點滴。好奇怪嘅地方以前睇我地嘅相都會覺得好開心好甜但相反依家睇返d相果種感覺係有一種從未試過嘅失落同痛。而呢種痛已經唔能夠用文字或言語去表達有多痛。如果真係有時光機可以俾我返轉頭…之前我都唔會諗咁多一定話返去最開心果段時光仲要永遠停止係果段時光當中。但依家嘅我一定會選擇回到未認識佢嘅時候，當時嘅我對愛情根本都唔會再投放太多感情落任何一個人嘅身上。自知就算自己真心對待對方到最後得到嘅未又係狠心分手。所以一路以黎愛情都只不過係一場遊戲，邊個認真就邊個輸。 直到佢出現慢慢改變我嘅睇法，係最頭果個半月我真係覺得自己終於搵到一個真正愛我懂得珍惜我嘅男人。除左個仔係我身邊嘅日子之外呢個半月我肯定咁答係我咁大個女過得最開心嘅時光，我終於感受到咩嘢係重視，尊重，著緊，同被愛。正當我以為自己好幸福嘅時候原來先係我真正要學識面對問題嘅開始。 其實我同一般係街上嘅女仔同樣都係普通人，我唔係識d特異功能又或飛天遁地。我唔係比其他人特別堅強我都會有軟弱嘅時候。我都需要係我無助嘅時候會出現係我身邊做一個支柱，我都好想有個人會保護我同我講別怕有我在！我都好想係我唔開心係我好攰嘅時候會有個膊頭俾我做我依靠。